El Conde Lucanor (Juan Manuel) Libros Clásicos

Página 72 de 207

Et pues vós, señor, tenedes por bien que vos conseje yo en todas las cosas que vos acaesçen, atreviéndome a la vuestra merçed et fiando del vuestro entendi­miento, pídovos por merçed que me consejedes en una cosa que a mí acaesçió.
El soldán gradesçió esto mucho al conde, et díxol’ quel’ consejaría muy de grado; et aún, quel’ ayudaría muy de buena mente en que quiera quel’ cumpliesse.
Entonçe le dixo el conde de los casamientos quel’ movían para aquella su fija et pidiól’ por merced quel’ consejasse con quién la casaría.
Et Saladín respondió assí:
-Conde, yo sé que tal es el vuestro entendimiento, que en pocas palabras que vos omne diga entendredes todo el fecho. Et por ende vos quiero con­sejar en este pleito segund lo yo entiendo. Yo non conosco todos estos que demandan vuestra fija, qué linage o qué poder an, o cuáles son en los sus cuerpos o cuánta vezindat an convusco, o qué mejoría an los unos de los otros, et por ende que non vos puedo en esto consejar çiertamente; mas el mio consejo es éste: que casedes vuestra fija con omne.
El conde gelo tovo en merced, et entendió muy bien lo que aquello quería dezir. Et envió el conde dezir a la condessa, su muger, et a sus parientes el consejo que el soldán le diera, et que sopiesse de cuantos omnes fijos dalgo avía en todas sus comarcas, de qué maneras et de qué costumbres, et cuáles eran en los sus cuerpos, et que non catassen por su riqueza nin por su po-der, mas quel’ enviassen por escripto dezir qué tales eran en sí los fijos de los reyes et de los grandes señores que la demandavan et qué tales eran los otros omnes fijos dalgo que eran en las comarcas.
Et la condessa et los parientes del conde se marabillaron desto mucho, pero fizieron lo quel conde les envió mandar, et posieron por escripto todas las maneras et costumbres buenas et contrarias que avían todos los que deman­davan la fija del conde, et todas las otras condiçiones que eran en ellos.

Página 72 de 207
 


Grupo de Paginas:             

Compartir:




Diccionario: