El Conde Lucanor (Juan Manuel) Libros Clásicos

Página 86 de 207

Et el conde, veyendo quel’ fazía Dios mucho bien en ello, dixo quel’ plazía mucho de fazer cu­anto don Alvar Háñez le dizía.
Et don Alvar Háñez apartósse con la fija mayor et díxol’ que si a ella ploguiesse, que quería casar con ella; pero ante que fablasse más en el pleito, quel’ quería contar algo de su fazienda. Que sopiesse, lo primero, que él non era muy mançebo et que por las muchas feridas que oviera en las lides que se acertara, quel’ enflaqueçiera tanto la cabeça que por poco vino que viviesse, quel’ fazié perder luego el entendimiento; et de que estava fuera de su seso, que se asañava tan fuerte que non catava lo que dizía; et que a las vegadas firía a los omnes en tal guisa, que se repentía mucho después que tornaba a su entendimiento; et aun, cuando se echava a dormir, desque yazía en la cama, que fazía ý muchas cosas que non en­peçería nin migaja si más linpias fuessen. Et destas cosas le dixo tantas, que toda muger quel entendimiento non oviesse muy maduro, se podría tener de’l por non muy bien casada.
Et de que esto le ovo dicho, respondiól’ la fija del conde que este ca­samiento non estava en ella, sinon en su padre et en su madre.
Et con tanto, partiósse de don Alvar Háñez et fuesse para su padre.
Et de que el padre et la madre le preguntaron que era su voluntad de fazer, porque ella non fue de tan buen entendimiento como le era mester, dixo a su padre et a su madre que tales cosas le dixiera don Alvar Háñez, que ante quería seer muerta que casar con él.
Et el conde non lo quiso dezir esto a don Alvar Háñez, mas díxol’ que su fija que non avía entonçe voluntad de casar.
Et fabló don Alvar Háñez con la fija mediana; et passaron entre él et ella bien assí como con el hermana mayor.
Et después fabló con el hermana menor et díxol’ todas aquellas cosas que dixiera a las otras sus hermanas.

Página 86 de 207
 


Grupo de Paginas:             

Compartir:




Diccionario: